Moisés Espejo doktoreak bere doktore-tesia defendatu du, sobresaliente cum laude kalifikazioarekin

Joan den astean, Moisés Espejo doktoreak, Asuncion Klinikako zuzendari medikoak, bere doktore-tesia defendatu zuen, eta sobresaliente cum laude kalifikazioa jaso du, hau da, aitortza akademiko gorena

Lana Madrilgo Ramón y Cajal Unibertsitate Ospitalean garatu da, eta SARS-CoV-2 birusaren transmisio-bideak ospitale-ingurunean aztertzen ditu ikuspegi multimodal baten bidez. Ikerketak literaturaren berrikuspen sistematikoa, ingurumen-lagin mikrobiologikoak eta infekzio nosokomialen agerraldien azterketa epidemiologikoa uztartzen ditu.

Ondorio nagusien artean, tesiak neurri operatibo zehatzak lehenesten ditu infekzioen prebentzioa hobetzeko: kontaktu handiko gainazalen (aginteak, barandak…) desinfekzioa indartzea, mendekotasun handiko pazienteetan baheketa lehenestea (Barthel ≤35 duten pazienteetan 3,39ko odds ratioarekin), klimatizazio-sistemak doitzea (24°C-tik gorako tenperaturak saihestuz) eta unitate barruko agerraldien zaintza aktiboa egitea aldizkako baheketen bidez.

Era berean, azterlanak berresten du tantazko eta kontaktuzko transmisio-bideak direla oraindik ere ospitale-ingurunean kutsatzeen arrazoi nagusia.

Lanaren ekarpen aipagarrienetako bat da marko metodologiko estandarizatu bat proposatzen duela, laginketa homogeneoan eta hurbiltasun espazio-denborazkoaren metriketan oinarritua. Horrek aukera ematen die ospitaleei birus emergenteen eta etorkizuneko pandemien aurrean azkarrago eta eraginkorrago erantzuteko. Ikuspegi honek erraztu egiten du kasu asintomatikoen detekzioa —aztertutako kasuen %38,6—, ZIU eta Larrialdiak bezalako eremu kritikoen lehentasunezko kudeaketa eta agerraldi nosokomialak murriztera eta baliabideak optimizatzera bideratutako eredu prediktiboen garapena.

Asuncion Klinikatik, zorionak eman nahi dizkiogu Espejo doktoreari lorpen akademiko garrantzitsu honengatik, eta, aldi berean, gure erakundearen konpromisoa berresten dugu bikaintasun klinikoarekin, ikerketarekin eta etengabeko hobekuntzarekin.