Lan-orientazioa Deustuko Unibertsitateko Erizaintzako lehen promozioarentzat Donostian

Joan den asteartean, martxoak 24, Donostiako Deustuko Unibertsitateko Campusean Erizaintzako I. Jardunaldia ospatu zen. Topaketa hau mugarri bat da zentroko lehen promozioko ikasleentzat; izan ere, lau urteko prestakuntza akademikoaren ondoren, lan-merkatuan murgiltzeko atarian daude.

Asuncion Klinikaren izenean, Patxi Izagirre Giza Baliabideen zuzendaria eta Mikel Oronoz Larrialdietako Erizaintzako gainbegiralea bertaratu ziren. Saioaren helburu nagusia 4. mailako ikasleei lan-ingurunearen ikuspegi errealista eta zehatza eskaintzea izan zen, horietako askok gurean egindako praktiken bidez hasitako lotura sendotuz.

Asuncion Klinikarentzat funtsezkoa da, prestakuntza aldian laguntzeaz gain, euren ibilbide profesionalerako benetako aukera erakargarri gisa aurkeztea. Zentzu horretan, gure antolakuntza-kultura partekatu genuen ikasleekin, eta gaur egun bizi dugun lantalde eta zerbitzuen berritze-prozesua azpimarratu genuen, horrek aukera zuzenak ematen baititu gure asistentzia-zerbitzuetan integratzeko.

Eskerrak eman nahi dizkiogu Deustuko Unibertsitateari jardunaldi hau antolatzeagatik, eta eskerrak baita ere gainerako erakunde parte-hartzaileei: COEGI, Policlínica Gipuzkoa, San Juan de Dios Ospitalea, Mutualia-Pakea eta Matia Fundazioa. Guztion artean, gure lurralderako osasun-ekosistema sendo eta kalitatezkoa eraikitzen jarraitzen dugu.